СЕЗОН

/шог өгүүллэг/
Би хадмынхаа байрны жижиг өрөөнд толгой хоргоддог нэгэн. Хадмын хатавч сахисан хүргэн, хадны завсарт хавчуулагдсан халиуны зулзага хоёр ижил юм аа гэдгийг яс махандаа шингэтэл ойлгож яваа зовсон амьтан. “Энэ нэг юм угаалгын өрөө эзлээд таг болчихлоо” гэж загнуулахгүйн тулд нүүрээ хам хум угаасан болж зогсохдоо би:
-Цаад нэг донгио юмны чинь “сезон” хэзээ орох юм бэ, тэгээд? хэмээн хадам ээж ууртай гэгч хэлж байхыг тодхон сонслоо. Намайг дуулаг гэж албаар чангаас чанга хэлж буй нь тэр. “Сезон” гэдэг уул нь гадаад үг л дээ. Наймаачид хүйтэрч нэхий дээл зарагдаж эхлэхээр “нэхийний сезон орлоо” гэж ярьдаг шүү дээ. Ямар эд бараа биш, эрэлт ихсэж, сезон ороод байхдаа яахав гэж би бодсон ч тэрийг нь оруулж чадахгүйдээ гутарна.
Энэ гэрт амьдарч буй хүмүүс надаас бусад нь бүгд сезон ордог. Одоо зуны эхэн сар тул хадам ээжийн сезон орж байгаа. Тэр, боловсролын түшмэл учраас дээд сургуулийн элсэлтийн шалгалтыг зохион байгуулдаг юм. Хадам ээж их оройтож шөнө дүл болсон хойно ирлээ. Цайгаа ч уухаа умартан, сэтгэл хангалуун суух зуураа газрын албаны даргын хүүг МУИС-ийн гадаад харилцааны ангид тэнцүүлж, хотын төвд газар авах болсон, мянгат малчин Жамбалын эрх охиныг нэг муу хувийн дээд сургуульд оруулаад өгтөл өвлийн идэш өгнө гэсэн, ха ха гэх зэргээр ярьж байснаа царайгаа хувьсхийлгэн миний авгай руу ширэв татаад,
-Та нарын төлөө, амьтан хүнээр муу хэлүүлэн хуруу хумсаа хугалж явахад чиний нөхөр гэж нэг донгио юм... гэж уурлалаа.
Энэ явдлаас хэд хоногийн дараа хадам аав хилээс ирэв. Тэр гаалийн байцаагч тул Бургастайн хилийн боомт нээгдэхэд сезон нь орно. Боомт улирал бүр сарын хугацаатай нээгдэх учир жилд дөрвөн удаа сезон ордог гэсэн үг. Хадам усанд орж дархан хилийнхээ шороо тоосноос салаад, өөхтэй мах огтлон зажлах зуураа,
-Энэ удаа Хятад руу төмөр их гараад, унац давгүй шүү. Ганцхан баян Балдангийн гаалийн бүрдүүлэлтээс л сая төгрөг ороод ирлээ шүү дээ. Ирэх зунаас хөгшнийхөө олсон газар дээр хоёр давхар байшин бариулна аа. Тэгээд муу охиндоо энэ байраа өгнө гээд авгай руу маань энхрийлэн харлаа. Хадам ээжийн малигар царай хувьсхийн,
-Хн, тэр нөхөр шүү юм нь өөрөө сезоноо оруулж байраа худалдаж аваг. Хүүдээ байраа өгнө шүү, ярихгүй гэж байна.
Авгай шүүхэд ажилладаг тул сезон нь үе үе орно. Баян хүн хэрэг хийвэл бүр пал хийтэл орно. Хөөрхий минь, миний хань шунал багатай дорой амьтан авахгүй гэж гүрийх боловч цаадуул нь хүчээр дарж байгаад атгуулчихдаг тул хадам ээж рүү боодолтой хүрэн улаан цаас шидээд бушуухан гараа угаана. Тэгээд над руу гэмшингүй хардаг юм. Харин нэг удаа орж ирээд, өврөөсөө мөнгө гарган сарвайгаад,
-Май, энийг ээжид өгөөд, миний сезон орлоо гэж худлаа хэл, тэгэх үү? гэж над руу гуйсан харцаар харан шивнэлээ. Би түүнийгээ тэврэн энхрийлээд,
-Талхны хувийн үйлдвэрийн борлуулагчаас хэн юу гуйхав дээ. Харин би “манай талхыг аваач” гэж хүн хүнээс гуйж царай алдаж явдаг заяагүй амьтан шүү дээ. Ээж итгэхгүй гэж учирлалаа.
Аравдугаар сарын эхээр нэг явдал боллоо. Энэ зун цэргийн сургууль төгсөж ирсэн хүр дүү хонь хөтөлсөөр орж ирсэн юм. Нэг малчин цэрэгт татагдаж буй хүүгээ Увсын Тэс рүү бус, Улаанбаатар луу хуваарилуулаад шагнасан нь энэ гэнэ. Хадам ээж маань:
-Цэргийн хэлтэст ажилд ороод сар ч болоогүй, хар нялхаараа дүүгийн чинь сезон орж байхад чиний донгиогийн сезон хоёр жил болоход нэг ч орсонгүй хэмээн авгайг маань бүтэн оройжин загналаа. Авгай доголон нулимстай өрөө рүүгээ орж ирээд,
-Дараа жилээс миний хөгшин мэргэжлийн ажлаа хий. Гадаад хэлний багшийн сезон уралдаант шалгалтын өмнө ордог шүү дээ гэлээ.
-Шохойны харшилтай болоод л талх борлуулагч хийж байгааг минь чи мэднэ шүү дээ гэвэл, авгай маань хэсэг бодолхийлээд,
-Хойд цэцэрлэгийн гал тогоонд сав угаагчийн орон тоо байгаа гэсэн. Намар болохоор хүмүүс “хүүхэд цэцэрлэгт оруулаад өг” гэж миний хөгшнөөс гуйна шүү дээ гэж байна. Энэ орой би үнэхээр сезон л ордог бол хамаагүй жорлон цэвэрлэгч хийхэд ч бэлэн болсон байлаа. Маргааш нь би захирлын өрөөнд халагдъя гэсээр явж орлоо. Тэгтэл захирал босч ирлээ.
-Чи битгий халагд, цалинг чинь хорин хувь нэмье гэж байна. Би хэдийг нэмсэн ч ажиллах боломжгүй, бүр шийдчихсэн гэдгээ учирлалаа. Захирал намайг сэнхэртэл ятгаад, үйлдвэртээ үлдээж, харин цалинг минь дөрөв дахин нэмж хоёр зуун наян мянга болголоо. Миний гүйж харайж, амьтан болгоныг гуйж гувшидгийн ачаар энэ үйлдвэрийн борлуулалт тав дахин нэмэгдсэн ч би анх орохдоо л авч байсан далан мянган цаасаа авсаар явснаа сая ухаарлаа. Нээрээ л би хадам ээжийн хэлдэг шиг донгио амьтан юм гэж бодогдлоо.
Энэ лут дүгнэлтийг хийсэн цагаас эхлэн миний сезон орлоо. Борлуулалтаас унац гаргалаа гээд улаан хүрэн дэвсгэрт хадам ээждээ гардуулдаг болсон юм. Цалин дээрээ нэмэгдсэн мөнгөнөөсөө сэм сугалж аваад, ажилдаа явна. Орой ажлаас ирэхдээ:
-Өнөөдөр унац гайгүй, долоон мянга орчим юм уу даа гэх буюу шальсангүй, тавхан мянга... гэнэ. Хадам ээж хайлсан тугалга л гэсэн үг.
-Манай хүргэний сезон өдөр бүр ордог юм. Дор хаяж л таван мянга. Авхаалжтай хүү шүү хэмээн хөрш авгайчууддаа бардана. Харин эхнэр маань над руу нэг л биш харна. Тэр минь намайг муу хүн гэж бодох болсон тул би түүнд нууцаа задаллаа. Эхнэр миний нууцыг сайн хадгалж, надаас “унац”-ыг минь баяртай гардан авч нэгд нэгэнгүй тоолон хямгадаж жүжиг тоглох боллоо.
Дараа жил нь хоёр давхар шилтгээндээ орохдоо хадам ээж:
-Ийм авхаалжтай, сүйхээтэй хүргэндээ байраа өгөлгүй яахав гэж палхийтэл хэлэх нь тэр ээ. Эхнэр бид хоёр байрны түлхүүр гардан авахдаа хоёр биеэсээ ичсэн гэж яав аа. Гэсэн ч авахгүй гэж хэлж чадсангүй.

МИКРО

БҮРЭНГИЙН ХӨГШЧҮҮД НАМАЙГ ШҮЛЭГТ "УРУУ ТАТСАН"

Зохиолч, яруу найрагчид гэдэг хошин шогоор амьсгалж, амьдарч байдаг хүмүүс. Төрийн шагналт, Соёлын гавьяат зүтгэлтэн яруу найрагч Дөнгөтийн Цоодолыг энэ удаа хоймортоо урьж нутаг усныхан болоод, зохиолч нөхдөд нь тохиолдсон хоржоонтой наргиантай агшнуудаас хуучилж уншигчдад маань инээд хайрлаач хэмээн хүслээ.
-Хөдөөгийн хөх өвгөдийн билэг гэдэг дундаршгүй. Танай Бүрэн нутагт шооч хэлэмгий хүмүүс их биз?
-Монголын сум болгонд ганц хоёрын зэрэг шооч хүн төрдөг юм шиг. Ухаандаа, шог зохиолч олон байдаггүй шиг. Манай нутгийн ах дүү заан Чоймбол, Дугаржав гэж байлаа. Нүгэлтэй сайхан давсалж ярина. Их сайхан сэтгэлийн худалч гэмээр юм уу даа. Хүн ямар нэг юм ярихад “Тэр чинь юу ч биш” гэж байгаад л авч өгдөг.
Дугаржавыг Бүрэнгийнхэн Ар халхын сэргэлэн Дугжаа гэж нэрлэнэ. Нэг нь зуухаа их сайхан татдаг гэж магтаж л дээ. Тэгтэл Дугжаагийн ярьдаг нь хөдөлж, ийм яриа болов гэнэ.
-Манай зуух алах нээ. Нүгэлтэй татах юм аа, хуйхалчих гээд л.
-Яаж байна? Дугжаа.
-Уул нь хуучин цоорхой гичий л дээ. Сумын төв ороод ноос ноолуураа тушаагаад мөнгөө амьтны дэргэд тоололтой биш орой ирээд тоолох гэтэл лаа байдаггүй. Зуухны аман дээр тоолоод орхиё уу гэтэл гичий чинь, өнөө хэдийг сүр пар хийтэл ховх сороод шатаачихлаа гэсэн гэж байгаа.
Айхавтар хурдан сэтгэж. Татдаг татдаг гэхэд, хүний гар дахь мөнгө ховх татаад, авахын зуургүй шатаачихдаг зуух гэж байх уу. Тэгээд болоогүй ээ, цааш нь угсруулан “Ингээд л ах нь чамаас ганц уут гурилын үнэ зээлье үү, гэж явна” гэсэн байгаа юм. Дор нь сийрнэ гэдэг л энэ.
-Тэмээний бөхний хооронд цэцэг ургатал таргалуулсан тухай та нэг удаа ярьж байсан. Бас л энэ Дугжаа гуайн яриа юу?
-“Тэмээ гэдэг амьтан мөн таргалах юм аа. Энэ хөх Жамбын мэлзэн нүгэлтэй таргалжээ. Ингэж байж сайн эрд идүүлчих вий дээ” гэж Бүрэнгийнхэн ярьж. Тэгтэл Дугжаа, “Тэр ч биш ээ, хэрэггүй л юм явна лээ. Тэрийг хэн иддэг юм. Тэр жил манай нэг сайхан тэмээ тэгж байж, хундаганы Жамьянд идүүлчихсэн дээ” гэж гэнэ. “Яасан юм, их таргалсан уу” гэсэн чинь, “Хавар алдчихсан гичийгийн чинь сураг нь гараад байхаар нь яваад очтол тамга нь мөн ч юм шиг. Гуян дээр нь дарсан тамга ташааных нь толион дээр гарчихаж. Ийм юм гэж юу байхав гээд лавлаж хартал, амьтан их таргалахаараа арьсанд мах чихээд тамга нь өөр газраа оччихдог юм байж” гээд, цаадуул нь гайхаж шогширохоор, улам цааш нэмж сэтгээд, “Үгүй мөн нүгэлтэй хом суусан байсан. Хоёр бөх туг ширээ, хооронд нь шороо тогтоод хонгорзул цэцэг ургачихсан явж байсан шүү” гэж туусан байдаг. Хом сууж, хонхортой болоод, тэнд нь шороо тогтоод, хонгорзул ургатал ярина гэж байх уу. Ингэж л сийрдэг эр.
-Таны шүлэг зохиол оролдож эхлэхэд энэ бүхэн мэдээж нөлөөлсөн байдаг биз.
-Үнэнийг хэлэхэд мань мэтийг шүлэг бичихэд "уруу татсан" улсууд чинь л тэд. Бүрэн сайхан нутаг. Дөрвөн голоо бараадаад л дөрвөн хэсэг буучихсан айлууд. Түүний нэг нь болох Талын булаг нөхцөлгүй шооч хүмүүстэй. Хүн шоолохоос ч өөр ажил ч байдаггүй байлаа. Зунжин согтуу, улаан нүдтэй лухайсан юмнууд биенээ явуулаад л найрлаад байна. Ингэлээ гээд гуйлгачин болчихдоггүй л байж. Намар болохоор дап хийгээд л жаахан өвс авчихна, ухасгээд хороо хотоо засчихна. Хэдэн сэгсүүрэг элдчихнэ. Жигтэйхэн гоё л амьдрал байж дээ.
-Найр гэснээс билэг ерөөлийг ч урсгаж өгнө биз?
-Манай нутагт Наваантэен Жигмэд гэж хөгшин бий. Хөдөө явж байтал нь Нацагийн хар Лувсанбалдан гэгч тааралджээ. Жигмэд нь:
Хаяа голоор нутагтай
Хамар муутай аавтай
Харвин голдуу ээжтэй
Хар Лувсанбалдан гуай хаа хүрч явна? гэсэн чинь Лувсанбалдан жаахан зуур далжийж байснаа, хариу барьж:
Хөхүүл нагай шиг ээжтэй
Хөгшин бурхи шиг аавтай
Хөвийн тогоруу шиг ахтай
Хөхүүр маягийн Жийгээ та хаа хүрч явна? гэсэн гэдэг.
Лувсанбалдангийн аав хамар муутай "напи" Нацаг гэж хүн, ээж нь нээрээ л харвин голдуу тарган бор авгай. Жийгээгийн ээж болохоор нагай шиг олон хүүхэдтэй, ах нь толгой нь салгалдаг, Жийгээ өөрөө хөхүүр шиг том гэдэстэй хүн байсныг нүдэнд харагдтал шүлэглэсэн нь тэр.
Иймэрхүү яриа үргэлж болно. Тэд ямар казинод тоглох биш, бөхөө үзнэ гэх биш, үгээр л тоглодог байж. Үгийн наадгай гэдэг энэ.
-Таны удамд шооч хүмүүс байсан уу?
-Гойд юм байгаагүй байх аа. Миний ганц ах элбэг Батсүх гэж амьтныг их инээлгэдэг хүн байж. Юм болгонтой болохоор нь “элбэг” гэдэг. Найран дээр ерөөнө, хүнийг нүгэлтэй адилхан элэглэж шоолдог, их сайхан зурна, бас дуулна. Айлууд морь зуруулж хоймортоо зална, сумын улаан буланд “Учиртай гурван толгой”-н Юндэнд тоглоно. Тэр үед сум бүр энэ дуурийг тавьдаг байсан юм шүү. Надаас хамаагүй чадалтай хүн байлаа. 1960 он гарч байхад, хорин тавтайдаа нас барчихсан юм.
-Таны нэг ярилцлагаас 1970 оны үед Төв аймагт ажиллаж байсан тухай тань уншсан. Тэр үеэ дурсахгүй юу?
-Аймгийн сонинд сурвалжлагч хийгээд, “Ингээд явж байхад боллоо” гэсэн бодолтой явж. Миний түрүү үеийн ах сурвалжлагч хагархай Дондогдорж гэж аймгийн бүх дарга нартай хампаан эр байлаа. Тэр надад “Миний хүү сургуульд явахгүй бол над шиг ийм угаасан эсгий малгай шиг юм болно шүү” гэж үргэлж захина. Тэгээд л зүтгэсээр, 30 шүргэсэн хөгшин оюутан болсон доо. Үзэлт суртлын тун айхавтар зэвсэг бэлдэх намын бодлогоор МУИС-ийн сэтгүүлчийн ангийг Намын дээд сургууль дээр аваачсан үе байлаа. Манай ангиас гайгүй сэтгүүлчид гарсан. Д.Жаргал насаараа Монгол телевизийн дарга хийлээ. “Өнөөдөр” сонины Р.Чулуун байна. П.Төмөрбаатар Дундговь аймгийн сонины эрхлэгчээр насаараа ажиллалаа. Л.Бат-Өлзий “Үнэн” сонины сурвалжлагч гэж мандаж байснаа одоо Сэлэнгэд хоёр мянган малтай болчихсон мөн л мандаж байна.
-Яруу найрагчдаас хамгийн их инээлгэдэг хүн нь хэн бол?
-Хүнийг шоолж инээлгэснээрээ диваажинд очих эрх авдаг бол, хамгийн түрүүнд Пүрэвдорж, Дооров хоёр эрхийн бичигтэй болох байх. Араас нь Бадарч, Лхагвасүрэн, Ядмаа гээд л жагсана байх. Бадарч бол их олон галын дунд байдаг хүн. Өөрөө хүнийг их оролддог учраас хариу их хүртэнэ. Эрдэнэсант, Овоотын хилийн цэргийн отрядын клубын эрхлэгч байсан. Гоё хөх даавуу дээлтэй, шар бүстэй, ороолтоо сул намируулсан сайхан шар залуу явдаг байсан. Дараа нь Офицерын ордонд ирээд, Улаанбаатарын гудамжаар нэг их гоё офицер алхах болсон. Бадарчийг:
Овоотын отрядын ногоон малгайт
Офицерын ордны цагаан толгойт
Эрдэнэсантын эрх шар
Эмээ нарын бэрх шар
Цэнхэр дэлгэцийн сэвдэг шар
Цэргийн чуулгын савдаг шар гэсэн байдаг.
Бас:
Намхан улаан хамар нь
Нанчдын дугараанд ноцно
Навчин хоёр чихэнд нь
Нарны шил гацна ч гэдэг. Ингээд тоочвол олон юм бий дээ. Хуучны зохиолчид хүзүү толгой холбоотой юм шиг л явцгааж, шүлэг зохиолоо уншдаг байж. Бид хэд хоног уулзахгүй бол биенээ үгүйлж, пар пар инээх юмсан гэж бодогддог.
-Цэдэндамбаа гуайг их онигоонд оруулсан байдаг шүү дээ.
-Цэдэндамбаа бол очсон газар бүхэндээ хүн инээлгэж явна. Ямар сайндаа л түүнийг ирэхээр Түдэв дарга ажлаа мартаад дагаж өрөө хэсээд инээгээд явж байх вэ дээ. Би түүний тухай онигоо зохиогоод “Ардын эрх” дээр гаргачихаад, өөрийг нь ороод ирэхээр өнөөхөө ярьсан чинь “Би нээрээ тэгсэн байх шүү” гэж байлаа.
Цэдэндамбаа нэг удаа жийнс худалдаж авсан залуугаас асууж гэнэ.
-За хүүхээ, наадах шинь хаанахын юм гээшиб?
-Аа, энэ оросынх оо. Их сайн жийнс.
-Хн, Орос юу ч биш. Англи их сайн хийдэг юм.
-Яагаад?
-Тайлаад тавьчихлаар зогсож байдаг гэж байгаа.
-Тэр лут юм аа. Манайд иртлээ ч өдий биз дээ.
-За за, тэр ч хэзээ ч ирэхгүй биз дээ. Гэхдээ францчууд бүр сайныг хийдэг юм ш дээ. Тайлаад тавьчихаар орны өмнө зогсож байна. Өглөө эзнээ босоод ирэхлээр өөдөөс нь явдаг гэж.
-Таны орчуулга сонинуудад нэлээд гардаг. Хэл хэдийнээс сурч эхэлсэн бэ?
-Мишигийн Цэдэндорж гуай надад хажуу зайнд нь улаан эрээн болтол нь тэмдэглэл хийсэн “Мой Дагестан” номыг 1970 оны майн баярын өдөр бэлэглэсэн. Түүнийг словарьдан уншиж байсан минь л хэл сурах анхны оролдлого болсон. Дараа нь Өвөр Жанчивланд амарч байтал ардын жүжигчин Гэндэн гуай: “Өнөөдөр миний төрсөн өдөр” гээд чих нь далбаганачихсан явж байна. Дэлгүүрт нь юм байхгүй. Амралтын дарга дээр ороод ч юм бүтдэггүй. Хаанаасаа хаалгач нь гэгчээр нутгийн найз, нярав дээр очтол өнөөхөөс юм гарлаа. Ингээд Гэндэн гуай “За хө чи их том гавьяа байгууллаа. Би өнөөдөр харваж үхэж ч магадгүй байсан” гээд надад 1944 онд хэвлэгдсэн Чеховын боть бэлэглэсэн. Эх орны дайн болж байхад оросууд Чеховоо хэвлэж л байсан байдаг. Сүүлд сургуульд явахдаа ганцхан тэр номоо авч явж байсан. Горькийн сургуулийн оюутны байр, 9/11 гэдэг байшин бол жинхэнэ уран бүтээлийн лагерь байлаа. Хэл сурсан бол 9/11-ийн гавьяа, муу сурсан бол бас тэрний муугийнх болох байхдаа. Горькийн сургууль гээд ярихаар адис авч, залбирмаар газар.
-Сургуулиа төгсөөд Зохиолчдын эвлэлдээ ажилласан байдаг уу?
-1982 оны зун нэгдүгээр курс төгсөөд иртэл манай “Утга зохиол” сонин дээр бөмбөг хаячихсан юм шиг байж байна. Цэдэнбалыг Цэдэнал гэж билүү дээ хэвлэлийн алдаа гарчихсан байлаа. Намайг энд ажилла, энэ сонины ажлыг ав гэж байсан юм. Би татгалзсан. Тарваа гуай ч ажилладгаараа ажиллаад, сониноо гаргаад л үлдсэн. Дараа жил нь төгсөж ирээд, зохиолчдын эвлэлийн яруу найргийн зөвлөлийн даргаар ажилласан. Тэр үед зохиолчдын эвлэл том газар байсан юм шүү. Ганц жишээ хэлэхэд 1987 онд Б.Догмид, О.Дарьсүрэн, Баярсайхан, Ж.Дашзэвэг нарын зургаа долоон хүний элсэх өргөдлийг нэг өдөр хурлаар оруулж, Дарьсүрэн бүр бүдэрч байсан юм шүү. “Ханын сүүдэр”, “Онцгой эрх” нь гарчихсан үе. Тэр том зохиолчдыг ингэж жижигрүүлж байж.
-Бид хоёрын яриа өндөрлөж байна. Сүүлийн хэдэн мөрийг таны мэдэлд өгье.
-Миний хувьд их мундаг шог зохиолч биш. Гэвч бүтээлүүдэд маань хошин шог өнгө аяс байнга зухалзаж байдаг юм шүү. Шог өгүүллэг орчуулж, ёгт үлгэрүүдийн орчуулгаараа ном ч хүртэл гаргаж явж. “Зохиолч хошин шогийн мэдрэмжгүй болбол зохиолчийнхоо хувьд үхэж байгаа нь тэр” гэж Максим Горький хэлсэн байдаг. Инээнэ гэдэг сайхан юм. Ертөнцөөс инээдийг нь хасчихвал хэн энд амьдрана гэх вэ.
/"Тоншуул" 2006/

Их хааны хөшөө

Хэлтгий дорой үг
Хүрэл чихэнд ч чийр болмуй

ЭМ ХҮЙСГҮЙ ДЭЛХИЙ

/хошин өгүүллэг/
Улсын их хурлаас Монгол улсын иргэн заавал эрэгтэй байх тухай хууль баталлаа. Манай улсыг “Эм хүйсгүй дэлхий” хэлэлцээрт нэгдэхгүй бол хандивлагч нар зээл өгөхгүй гэж нээнтэглэсэн юм байж.
Гурав хоног эр хүн шиг жаргалтай амьтан байсангүй. Хундагаа элэгдтэл сархад хүртэж, хутгаа мохтол мах зооглов. Араас үглэж янших хүнгүй болно гэдэг амьдын жаргал байлаа.
Харин дөрөв дэх өглөө нэг л биш эхлэв. Нар хүртэл шартаад бүрзийчихсэн мандлаа. Эрчүүдийн ам ангаж, толгой ангалзаж, үхэхэд нэг хуруу дутуу амьтад өндийсөн боловч хэн ч тэдэнд бантан дөхүүлж өгсөнгүй.
Дэмий л хөршийнхөө хаалгыг нүдэж, “Шартаж үхлээ.., ганц юм байна уу?” гэж уруу дорой царайлцгаав. Тэд хундаганы шавхруу ч олж долоосонгүй. Ядахдаа ханын цоргоноос ус дусдаггүй. Ундны усыг шахахаас эхлээд архийг лангуунаас худалдах гэхчлэн хамаг ажлыг өнөөх бүсгүйчүүд залгуулж байсан болж таарав. Жорлонгийн суултуурын ар дахь ус хураагуур л зовсон цагт зоригт эрсийн аминд оров.
Улсын их хурлын чуулганыг цагт нь нээсэнгүй. Ерөнхийлөгч хиртэй цамц, индүүгүй өмдтэй ирсэн бол ерөнхий сайд сахал үсэндээ баригдаж, хүрэм нь үрчийсэн харагдана. Их хурлын даргын чуулган нээж хэлэх үг байдаггүй. Хуучин сайхан цагт нарийн бичгийн дарга бүсгүй хэлэх үг, уух усыг нь жин тан бэлдчихдэг байсан санаанд орж, цээж нь урагдаж, ам нь хатав. Гүндалай Жаргалсайхантай маргасангүй. Авгай нар нь тэдэнд хэрүүлийн үг зааж өгч явуулдаг байсан юмсанж. Төрийн гурван өндөрлөг, эрхэм гишүүд дэмий л шартаж шаналан баахан сууцгаагаад, тарлаа.
Үдийн хэрд толгой нь ангалзсан эрчүүд эмийн сан руу дайран орцгоолоо. Гэвч толгойны эмийг “анальгин” гэж мэддэг нэг ч эр тодорсонгүй. Эхнэрүүд нь “Май хөгшөөн, толгойны эмээ уу” гэдэг байснаас биш, нэрийг нь хэлж өгдөггүй байсан юмсанж. Эрчүүд тосон туулга ууж, ангаж цангасан дээрээ нэмж хагас өдрийн турш шингэнээр харваж, нүднээс гарч, хамчийж хорчийсон юмнууд болцгоов.
Мянгат малчин Галт гуай өлссөнөөс хий аргаж үхэв. Арга байж уу, хөөрхий. Галаа асааж, шөлөө буцалгаж, махаа чанаж идэж чадалгүй дөрөв хоночихсон юм чинь. “Далай” пүүсийн захирал Дэмчиг тайлан тэнцлээ мэдэхгүй мунгинав. Өдөржин ноцолдоод, аргаа барж, орой тийшээ дампуурлаа зарлахаас өөр бодогдох юмгүй боллоо.
Нийслэлийн 479 дүгээр цэцэрлэгийн нярай ангиар нэг өмхий самхай, шивтэр ханх тавив. Хүүхдүүдийн живхийг солилгүй бүтэн дөрөв хонуулчихаж байгаа юм чинь аргагүй шүү дээ. Цэцэрлэгийн сахиулаар ажиллаж байгаад асрагч болж дэвшсэн согтуу Балдангийн толгойд хүүхдийг хуурайлах тухай ядахдаа хүжийн галын чинээ ойлголт суугаагүй байж.
Аймшигт өдөр дуусч шөнийн түнэр харанхуй монгол нутгийг нөмөрлөө. Эрхэм гишүүн Хүрэлсүхийн зүүдэнд Ахмадын чөлөөт холбооны Баасан эгч орж ирэв. Зүгээр ч нэг орж ирсэнгүй. Томоос том гуулин данхтай зэлгээн цай барин ирж, хөөрхий гишүүний ам руу нь цутгав. Ангаж цангахын туйлд хүрсэн Хүрэлсүх гишүүн “Баасан эгч минь ээ!” хэмээн байдгаараа орилон босч ирээд, зүүдэлснээ мэдэн гутарч, “Муу Баасан эгчийгээ яах гэж тэгж үзэн ядаж байв даа…” гээд үсээ үгтээн эхэр татууллаа. Тэрээр авдрынхаа мухарт нуусан Намсрай бурханыг сэмхэн гаргаад, “Баасан эгчийг, гуулин данхтай цайтай нь ирүүлж хайрла!” хэмээн наминчилж, арвантаа сөхрөн мөргөж байлаа.
Тав дахь өглөөний тав гучид жорлонгийн суултуурын арын савны нөөц ус дуусав.
Их хурлын эрхэм гишүүд ээлжит бус чуулгандаа бараг л мөлхөж ирцгээлээ. Гал цогтой шингэн дуу нь цааш орсон Гүндалай гишүүн “Монгол улсын иргэн эмэгтэй байж болох тухай хууль баталъя!..” гэж гонгинох аядаад, налмайтал уналаа. Усгүй хатаж зүүд зэрэглээ шиг сүүмийсэн Жаргалсайхан гишүүн “Дэмжиж байна, баталъя!” гэж царгисан хоолойгоор чарлахчаан болоод, Гүндалайтай зэрэгцэн, мөн л тэрийн ойчив.
Гишүүд байдаг хүчээ шавхан товчлуур луугаа зүтгэхийг оролдсон боловч хөдлөх тэнхэл хэнд нь ч үгүй болсон байлаа.

Сэтгүүлч нөхөд

--- 1990 он ---

ӨНӨӨ ЦАГИЙН СҮХИЙН ХӨШӨӨ